قصتي مع صاحب فورد 2011 بمعارض الشفاء وارجوا الحذر منه

75 15

لايمكنك التصويت حتى الحصول على 20 نقطة على الأقل
إضغط هنا للإخفاء

ابو يزيد 000 8714
قبل 8 سنه و 8 شهر

السلام عليكم ورحمة الله وبركاته
أسعد الله مساء الجميع بكل خير
هذا موقف حصل معي قبل 3 ايام بمعارض الشفاء

وحبيت اطرحه في المنتدى , عشان ما تغلطون مثلي , وتتعلموا من اغلاط الغير , عشان لا تطيحون فيها بحياتكم مستقبلا

والحياه تجارب , واحياناً تخيب واحياناً تصيب , والحلو في الامر , ان الواحد يتعلم من غلطته , وهذا بحد ذاته فائده

لكن قبل نبدى الموضوع , جدي امس توفى واليوم دفنّاه , نسأل الله انه يرحمه وينقيه من الذنوب والخطايا كما ينقى الثوب الابيض من الدنس ويجعل قبره روضه من رياض الجنّه , ويجعله ممن يدخلون الجنه بلا حساب ولا عذاب , اللهم امين اللهم امين

نبدأ بالموضوع

كنت ادور لـ اخوي سياره يروح عليها للمدرسه لانها اخر سنه له , ولقيت الخيار المناسب هو الفورد , لانها كبيره والبودي متين ويتحمل الحوادث لا سمح الله

وحصلت اعلان عن فكتوريا 2011 امريكي ذهبي لوحه ( ح ا ي 8945 )

مكتوب انه طالع من صاله , ومحول لونه من الاسود الى الذهبي , تجميلي والسياره شرط بسعر معقول 30 الف ريال

اتصلنا على الرجال , وسألناه عن السياره أسئله عامه 

فقلت له , الرش تجميلي اكيد وخاليه من حوادث ؟ 
قال شرط مافيه حوادث , بس مغير لونه للتجميل الى السمني بدون حادث
والرش يحلف بالله انه مكلف 5000 الاف ريال حرق بويه وفرن بالبيان

ومن هنا ومن هناك شرط السياره وقال لا تكثر اسئله وتعال شوفها بنفسك , قير مكينه دفرنس ارباقات شاصات اخت الجديده وخاليه من الحوادث والرش فقط تجميلي ويحلف بالله مافيه سوق ولا زباين يقول لو فيه سوق كان جابت لي فوق 40 الف من نظافتها لكني محدود على بيعتها ومحتاج

وقلت خلاص بجي اشوفها والله يكتب مافيه الخير , وقال اكيد , ويزاعق بالتلفون الله يهديه , قلت ايه ايه ان شاء الله , قال خلاص الحين بحجزها لك , قلت طيب , ومن طيب نيتي , قلت يمكن كثير كلموه وخذلوه , ولا لقي الشخص الجاد فعلا , فطبيعي يكون كذا معصب ويدور للزبون الجاد

جيته من شمال الرياض , الى الشفاء , وهذا ان دل , فانه يدل على اني انسان جاد , وماني من الناس اللي تلعب


وصلت عنده بعد مشوار طويل , شفت السياره بنظري , واكتشفت ان الرش ابو 5000 الاف ريال الفرن على كلامه , سيء مع احترامي الشديد والبويه باهته او تقدر تقول نص لمعه
والاسطبات لاحقها رش بويه ذهبي , وهذا دليل ان الرش يدوي وبعيد جدا عن شيء اسمه فرن !!

لكن عديتها , وسالته فيه حوادث , وقال شف ما بغشك , فيه دقشه على الشمعه بس وتصلحت وشف التعديل , رفرف وشمعه فقط , وكنت بقوله وليه ما قلت لي بالجوال , لكن عديتها مره ثانيه , احتراما له , و قلت فيه غيرها قال شرط بس هذي وماهي باينه , وقلت انا مالي خبره كبيره يا عم , ولكن بفحص السياره كمبيوتر اختصارا للوقت , وقال طيب , لكن عطني عربونك واركب !! قلت العربون بعد الفحص ان شاء الله !! 

قال هات عربونك واركب نروح الفحص !! يابن الحلال خلنا اول شيء نفحص , قال الموتر شرط ياخوك  ,وانا حجزت السياره عشانك , قلت بنفسي , هذا الفعل شهامه منك انك حجزت السياره لي , لكن انا ما قلت لك احجزها لي وبعطيك عربون !! وكنت بقوله كذا

 لكن قاطعني وكتمتها بنفسي مره اخرى وقال اسمع : ان طلع بالسياره غير كلامي بيرجع لك العربون , وفوقها قيمه الفحص وش تبي اكثر من كذا

واخوكم ابو يزيد , عاد وش يقول بعد هالرد !! والرجال كبير بمثابه الوالد عمره بالخمسين , واحسه مغبون وصادق في كلامه , وانه محدود على بيعتها وانه ماهو شريطي , ودايم يكرر والله ياناس ماهي قيمتها لكني محدود , وش تبي اكثر من فورد 2011 بالهسعر , وقلت له ياعم احنا مانركب موديل , احنا نركب سياره نظيفه , ويقولي الموتر شرط وقعد يمدح فيه سيارته كثير ويقول والله صيده بين يديك وش تبي اكثر من كذا , وانا منحد ولا تستغلوا حاجتي في صالحكم

وانا قلت بنفسي وكتمتها برضوا , لو تعطيني فورد 2003 نظيفه محركات وبودي , او 2011 ماهو نظيف , بفضل 2003 , لانه ماهمني الموديل , تهمني النظافه اكيد , لكن لانه كبير وما غير يزاعق , سكتت , ماهو خوف منّي , لا والله , هذا احترام لفارق السن بينه وبينه 

وركبت معاه , ووقفني عند بنك وقال 1000 ريال الله لا يهينك , وزدت رجعت له قلت الموتر شرط , قال والله ياخوك شرط , ابغشك يعني !! انا ابو عيال وما باكل حرام , هذا وجهه واحد يغشكم , انزل جبلي الف ريال الله يصلحك , وقال بعصبيه كذا  , وعاد وش اسوي , ابو يزيد ما يحب يدخل في نقاشات زي كذا  , ولا زالت النيه صافيه انه صادق ومغبون وقلت انا اخذ بكلام الرجاجيل, ان كان الموتر فيه شيء ترجع لي قيمه الفحص والعربون , قال اكيد , وعطيته الالف ريال  .. 

وصلنا للفحص وفحصنا شامل

العيوب اللي ظهرت لنا
1/ صدمه بالمقدمه واصله للرديترات
2 / الرديتر ماتغير , فقط تصلح وباين انه مطعج من كل جههه
3/ الواجهه الاماميه مفكوكه كامل اثر الصدمه
4/ فيه لحام خلف الشبك , وعلى كلام الفني , فيه شيء كان يطلع صوت , ولحموه وغطوه عشان لا يطلع صوت او يبان
5/ جهاز ABS متضرر من الحادث واسلاكه نازل من خلف الصدام

6/ صدمه بالخلفيه واصله لنصف الرفارف الخلفيه
7/ لا شلت البطانه حقت الشنطه راح تشوف سمكره الرفارف الداخليه
8/ الشنطه خربانه وماتفتح او تسكر الا بالملعنه ولازم تقعد ضاغط الزر
9/ العواكس السوداء بالشنطه غير موجوده ومرشوشه بنفس لون السياره

10/ الجسور الاماميه والخلفيه متضرره , وتم تلحيمها ولا تغيرت
11/ صدمه بجانب السايق مأثره على العامود بعد الفحص مني انا لان الفحص ماطلعها
12/ على كلام الفني مقص الكفر الخلفي العلوي وليس السفلي متضرر , وهذا ما يتأثر الا من ضربه رصيف على الجنط جهه السايق
13 / اليايات الاربع مسخنه
وغيرها

وندخل بالمشاكل المكانيكيه
المكينه والقير بفحص الضغط اخذت نسبة ممتاز هذا اللي فلحت فيه
الدفرنس بعد التجربه او الكرونه , طلع فيه صوت خفيف
الدفرنس يهرب زيت
المكينه بعد التجربه كتمت لمده دقيقه وعداد الار بي ام ينزل ويطلع بدون استجابه
الفحمات والقماشات والجلنط والهوبات تحتاج صيانه مع ميزان لانها تحذف
تصفيه مكينه او طرمبه بنزين بسبب الكتمه
وغيرها

طبعا بعد هالمشاكل , قلت يا غالي , طلع فيه مشاكلها , ممكن لا انا ولا انت تعرفها , فكم فكم تنقص لنا بعد هالمشاكل !! قال ما ينقص ريال , والفحص كاذب ,والموتر شرط والمكينه والقير مثل ماتشوف ممتازه ما شاء الله ,الموتر شرط!!

قلت والعيوب الثانيه ,قال يابن الحلال نصها استهلاكيه وطبيعيه ونصها كذب , وانا قلت بنفسي مره ثانيه , ولا اظهرتها له , احتراما وتقدير لكبر سنه , كيف دفرنس ويايات وكتمه مكينه وحوادث اماميه وخلفيه وجنبيه بعد تكون استهلاكيه وكذب !!

وقلت له والله انا احس ما عاد يناسبني السعر والسياره طلع فيها عيوب كثيره , فما ادري بخصوص العربون , تعطيني اياه الحين !! قال ما يرجع العربون !! قلت يابن الحلال , اتفاقنا قبل اسلمك العربون انه اذا طلع فيها مشاكل تردلي قيمه الفحص والعربون


قال الفحص كاذب , وقلت بنفسي طيب انا وش ذنبي الحين !! مشكلتك هذي مع الفحص مو معي , اذا تحسه غشك راعي الفحص , ادع عليه من اليوم لبكره , اما انا بروح وردلي عربوني على اتفقانا ولا ابيك تدفع قيمه الفحص يعني الخساره علي مو عليك , لكن والله ما قلتها له الا انه كبر ابوي واحسه عيب اقوله كذا , وابغاها بالهداويه اجيبها ونراضيه , وقلت انا بس عطني ال1000 ريال وبمشي , انت ما راح تخسر شيء  ,لان السياره طلعت على غير ما اتفقنا عليه , وعيا يقول الفحص كاذب , والسياره والله شرط لا دفرنس ولا شيء !!

وعاد انا قلت له يمكنك محتاج , ومنحد , لكن اعتبرها سلف , وعطيته رقم حسابي , وقلت له , كلنا نعرف الحقوق , وكلنا نعرف الاتفاق , اذا السياره طلع فيها عيوب غير المذكوره ترد قيمه العربون , لكن اذا تعتبر اني ما استحق يرجع لي العربون , فخلاص خذه , لكن حسابنا عند الله ومشيت

لان الرجال ماعنده الا التزعيق ورفع الصوت , ويحسب الدنيا خلاص فوضى , ماخذ مبدأ برفع صوتي واكل حقك وحق غيرك لاني طويل لسان وحار والناس ماتحب المشاكل

وهذي حركته من اول , اخذ العربون عشان يخليك غصب تشتري او ياكله عليك

يوم قلت له العربون رجعه لي , قام يتكلم بالحقوق , ويقول انه من حقي العربون الحين لانك انسان ما شريت ومثل ما يقول جاي بس تلعب وتطقطق , وانا والله اني جاد ونيتي ما يعلم فيها الا الله , وثانيا ما قلت كذا خلاص ماعاد لي نفس بسيارتك وجاي اتعبك والعب ,ياخي سيارتك فيها عيوب ملأ الارض ولا عاد تناسبني , عذري معي !!

ولو جينا نتكلم بالحقوق , العربون ماهو من حقه ياخذه قبل الفحص ابداً وهذا كلام راعي المعرض , لاني انا ما بشتري سكر بمويه , انا بفحص وانا ناسبت بدفع لك عربون , وان ماناسبت الله يستر علي وعليك , والمشكله اني انا انسحبت بسبب العيوب , وبسبب تناقض كلامه , ما انسحبت مثل بعض الناس اللي ينحسب من راسه ومن مزاجه , بس يتعب البائع , بالعكس انا البايع اللي تعبني ومشورني وغشني وبالاخير سرقني

فهذي قصتي مع الشريطيه وخلاصه الموضوع :

_ _ _ _ _ _ _ 

1 _ العربون لا تدفعه نهائيا , الا بعد الفحص وبعد ما تناسبك السياره
لان العربون بمثابه انك تقول خلاص اعجبتني سيارتك واعتبرني شريت
وهذا عربوني بمثابة حجز للسياره لين ما اكمل باقي المبلغ بنفس اليوم او بكره 
انا غلطت صحيح , فانت لا تغلط , وتدفع , الا اذا اعجبتك السياره بعد الفحص 




2/ ابعد عن شيء اسمه مرشوش نهائيا , يا كم واحد تسأله ويقول فيها رش رفرف فقط , ويوم تفحص تحصل الوجهه كامل مرشوش,ويقول لك لتوحيد اللون او ( تجميلي ) ,والغبنه لما تعرف انها حادث , وابعد عن المرشوش كامل , والله انه ملعوب في حسبته , ما احد بيطق براسه ويروح يرش كامل , الا ان الموتر معدوم من جميع الجهات وماكل 500 حادث !!

3/ نصيحه , لا تشتري من شريطي , او من واحد ما اعجبك اسلوبه وتعامله , في بدايه الامر ,  اعتذر منه على طول , لانه راح يبهذلك , هذا يوم انه لسانه طويل , كان المفروض اقوله ما بدفع لك العربون , الا بعد الفحص وان كان ماناسبتك هالحركه , فاعتذر منك , وكان مشيت , وكان فكيت نفسي منه 

4/ ان كانك تقدر على الجديد , لا تفرط فيه , وهذا اللي بسويه ان شاء الله , وفك نفسك من المستعمل وغثاه , والغش اللي سار شيء طبيعي , والشريطيه اللي ماعاد عندها ذمه ولا ضمير , ناس سار شيء عادي تاكل بالحرام وتبيع بالحرام , وما نسوا ان كل يوم يمر , ينقص من عمرك يوم , وان هالدنيا ما مها عشت فيها , مصيرك مثل الناس , راح تموت راح تموت , فالواحد يبنى مستقبله الاخروي قبل مستقبله الدنيوي , لان الاول دائم والثاني زائل

5/ لو انحديث على المستعمل , اسال راعيها عن كل صغيره وكبيره او بإخصتار العيوب بالتلفون وخله يرسل لك صور من جميع النواحي , لا قالك لا تكثر اسئله او تعال شوف , قوله هذا من ابسط حقوقي , عشان لا اجي وانصدم بعيوب انت مخفيها لاني حصلي اكثر من موقف فلا تخليني اضرب مشوار وفي الاخير يطلع فيها عيوب ماهي واضحه بالصور او مخفيه , فاتمنى توضح لي كل شيء بالسياره لاني بالنهايه بافحص وماهي حلوه يوم افحص ويطلع عيوب ونحرج بعض !! وبكذا تقفل على نفسك ابواب كثيره

6/ لا اتفقت مع شخص على سياره وقال شرط وانها نظيفه ,  وجيتها , وشفتها غير بـ الواقع , يعني طلع فيها حكوك قويه او رش سيء او وقفتها ماهي مظبوطه او طلع فيها عيوب , فعلى طول اعتذر ولا تتعب نفسك وتفحص , لان الكتاب يبان من عنوانه, فاركب سيارتك وامش , حتى لو يقولك انك منت جاد وجاي تلعب , قوله ايه انا ماني جاد , مثل ما انت تكذب باعلانك لانك ماذكرت هالعيوب

7/ لو معك مثلا 30 ألف , لا تدور موديل و تشتري فيها سياره مثل فورد 2011 ب30 , لانه ماحطه ب30 الا لانه فيه عيوب , واعرف انه شريطي ويخفي عيوبها ,  دامك تبي تستخدم دور نظافه , لا تدور موديل , خذ 2003 او 2004 نظيفه وكاله ب 30 , ابرك من 2011 وتقعد كارهه نفسك , تنسيم ابواب , مشاكل , رشوش , اشتر موتر يعزك واتركك من موتر يذلّك 

8/ الحين اسعار السيارات نزل الحمد لله بنسبه حلوه , فلو تزيد المبلغ اللي معك 20 الف او 25 الف , افضل لك , مثل السوناتا الجديد النصف فل بدون فتحه ب 67 ألف 2016 , المازدا زوم 6 موديل 2016 ب 66 الف ريال , الاوبتيما نص فل بدون فتحه 2016 بسعر 63 ألف ريال ,  الكامري 2016 استنادر ب 67 ألف ريال

في الاخير ما اقول اني طلعت بخساره فقط !!
صحيح طلعت بخساره , ولكن بنفس الوقت طلعت بـ مربح
وهو اني تعلمت , فمستحيل بكره اطيح بنفس غلطتي , لان المؤمن لا يلدغ من الجحر مرتين
ومثل ما قلت لكم , الحياه تجارب , اللي ما يجرب نهائيا , ما راح ينضر صحيح لكن ما راح يستفيد شيء بحياته لانه ما جرب شيء , فجرب واغلط وتعلم

إبلاغ

الردود